Karvon
Imtihon qo'llanmasi

Imtihon kuni nima bo'ladi

IELTS qanday tuzilgani, har bir bo'lim necha daqiqa davom etishi va imtihon kuni nima olib borish kerakligi — bir sahifada.

To'rtta bo'lim

Listening, Reading va Writing bir kunda, tanaffussiz ketma-ket o'tadi — jami taxminan 2 soat 45 daqiqa. Speaking ko'pincha boshqa kunda bo'ladi.

Imtihonning to'rtta bo'limi to'rt xil ko'nikmani tekshiradi va har biri o'z taktikasini talab qiladi. Quyidagi qo'llanmalarda savol turlari, vaqt taqsimoti va eng ko'p uchraydigan xatolar batafsil yozilgan.

Listening

~30 daqiqa (+ qog'ozli imtihonda javoblarni ko'chirish uchun 10 daqiqa)

4 qism, 40 ta savol. Audio faqat bir marta qo'yiladi. Kompyuterli variantda ko'chirish vaqti yo'q — tekshirish uchun 2 daqiqa beriladi.

Savolni oldindan o'qib qo'ying. Bir javobni o'tkazib yuborsangiz, to'xtab qolmang — audio kutmaydi.

Qo'llanmani o'qish

Reading

60 daqiqa

Academic uchun 3 ta uzun matn, 40 ta savol. Alohida ko'chirish vaqti yo'q.

Har bir matnga taxminan 20 daqiqa. Bitta savolga 2 daqiqadan ko'p ketsa — belgilab qo'ying va davom eting.

Qo'llanmani o'qish

Writing

60 daqiqa

Task 1 — grafik yoki diagrammani tasvirlash, kamida 150 so'z (~20 daqiqa). Task 2 — insho, kamida 250 so'z (~40 daqiqa).

Task 2 ikki barobar ko'p ball beradi, shuning uchun avval Task 1 ni 20 daqiqada tugatib, qolgan vaqtni inshoga bering.

Qo'llanmani o'qish

Speaking

11–14 daqiqa

Part 1 — o'zingiz haqingizda qisqa savollar. Part 2 — karta bo'yicha 1–2 daqiqa gapirasiz (1 daqiqa tayyorgarlik). Part 3 — o'sha mavzu bo'yicha chuqurroq muhokama.

Bir og'iz javob bermang. Har bir javobni sabab yoki misol bilan kengaytiring.

Qo'llanmani o'qish

Imtihon kuni

Amaliy tomonlari — bularni oldindan bilib qo'ygan ma'qul.

  • Ro'yxatdan o'tishda ishlatgan hujjatingizni (odatda pasport) olib boring — usiz kiritishmaydi.
  • Belgilangan vaqtdan kamida 30 daqiqa oldin yetib boring; kechikkanlar kiritilmasligi mumkin.
  • Telefon, soat va sumka zalga kiritilmaydi — ular saqlash joyiga topshiriladi.
  • Yozuv qurollari markaz tomonidan beriladi; lug'at ishlatish taqiqlanadi.
  • Suvni faqat yorliqsiz shaffof shishada olib kirish mumkin.
  • Britancha va amerikacha imlo — ikkalasi ham to'g'ri hisoblanadi, lekin bittasini tanlab, oxirigacha shunga amal qiling.
Natijalar qachon keladi

Kompyuterli imtihonda odatda 3–5 kun, qog'ozlisida 13 kun atrofida. Ba'zi markazlarda bitta bo'limni qayta topshirish (One Skill Retake) imkoniyati bor, lekin bu hamma joyda emas — markazingizdan aniqlang.

Eng ko'p uchraydigan xatolar

Listening-da javobni ko'chirishda xato qilish
Qog'ozli imtihonda 10 daqiqa ko'chirish vaqti bor — raqam va imloni shu payt tekshiring.
Reading-da birinchi matnga juda ko'p vaqt sarflash
Vaqtni oldindan bo'lib oling: 20 + 20 + 20. Uchinchi matn odatda eng qiyin, unga vaqt qoldiring.
Writing Task 1 da fikr bildirish
Task 1 da faqat grafikdagi ma'lumot tasvirlanadi — sabab ham, taklif ham, shaxsiy fikr ham kerak emas.
Writing-da so'z sanog'idan kam yozish
150 va 250 — minimal chegara. Kam yozsangiz, ball avtomatik tushadi, mazmuni yaxshi bo'lsa ham.
Speaking-da yodlangan javob aytish
Imtihonchi yodlangan matnni darrov sezadi va ball tushadi. Oddiy, o'z so'zingiz bilan gapiring.

Formatni bildingiz — endi sinab ko'ring

Diagnostika 25 daqiqada hozirgi darajangizni ko'rsatadi, to'liq mock esa haqiqiy imtihon uzunligida.

Bepul boshlashIELTS ballari haqida